Арктикатааҕы култуура уонна искусство институтугар кииригэ туттарсар докумуону тутуу бэс ыйын 19 күнүттэн саҕаланыаҕа уонна атырдьах ыйын 17 күнүгэр түмүктэниэҕэ. Ол гынан баран айар хайысхалаах идэҕэ туттарсааччылар эбии тургутууну ааһар буолан, кинилэргэ болдьох арыый эрдэ олохтонор: атырдьах ыйын 3 күнүгэр дылы. Атырдьах ыйын 4 күнүттэн туттарсааччылар айар дьоҕурдарын көрүү саҕаланар.
Быйыл Арктика институтугар Российскай Федерация бүдьүөтүттэн уонна республикабыт үбүлүүр миэстэтин ахсаана урукку сыллардааҕар лаппа эбиллиэҕэ. Ол курдук 21 хайысха5а “федеральнай” барыта 173 миэстэ көрүллэр. Онтон 124 күнүскү, 49 кэтэхтэн үөрэнэргэ. Республика быйыл эмиэ бүдьүөтүттэн балачча көрдө: 47 миэстэ. Ааспыт сылы кытта тэҥнээтэххэ, барыта икки бүк кэриҥэ элбэээбит.
Эбии төлөбүрдээх үөрэх эмиэ баар. Онно 50 % диэри чэпчэтиинэн туһаныахха сөп. Ол туһунан сиһилии үлэ чааһын кэмигэр ылар хамыһыйаттан билсэҕит.
Билигин айар дьоҕурдаах ыччат элбэх, айдарыыларын толору арыйарга, дьон сэҥээриитин ыларга Интернет, социальнай ситим баар буолан, кыаҕы туһанарга тоҕоостоох кэм үүннэ.
Институт Саха сиригэр тэриллибитэ быйыл 20 сылын туолар. АГИКИ- суверенитет, республика биир ситиһиитэ. Саха омугун тумус туттар дьонун: маҥнайгы президент Михаил Ефимович Николаев, култуураны уонна искусствоны Саха сиригэр уһулуччу таһымҥа таһаарбыт , улуу режиссер, тэрийээччи Андрей Саввич Борисов биир санаалаахтарын түмэн чиҥ олугу олохтообуттара.
Дириҥ толкуйтан, ырааҕы анаарартан иитиэхтээн, бүөбэйдээн, сайыннаран кэлбит үөрэх кыһата атаҕар туран, уустук кэми ааһан, кэҥээн-сайдан, билигин Саха сирин эрэ буолбакка, Уһук Илин федеральнай уокурук Арктика регионун бүтүннүү хааччыйар кыһа буолла.
Манна билигин айар ыччат талаһар идэтэ арааһа баар. Дизайнер, киинэ уонна театр артыыһа, живопись, графика, ювелирнай оҥорон таһаарыы, хореография, вокал, музыка, фольклор араас хайысхата, култуура эйгэтигэр салайааччы, продюсер, маассабай тэрээһини сүрүннээччи, ону таһынан библиотека үлэһитэ, информатик-программист, музеолог, искусствоны, култуураны чинчийээччи.
Бу кадр барыта креативнай экономика сайдыытыгар үлэлииргэ, онно кылаатын киллэрэрсэргэ бэлэмнэниэхтээх,. Быйыл республика тас өттүттэн: Камчаткаттан, Чукоткаттан, Хабаровскай, Красноярскай, Амур уобалаһыттан абитуриеннар туттарсарга баҕалаахтарын биллэрдилэр.
Үөрэх хайысхаларын туһунан сиһилии манна билис:
http://agiki.ru/sdelaj-svoj-talant-professiejpostupaj-v-agiki